Amapolisa akuGatyana avukele kwindawo yaseNqabarha ngentseni yama-22 kweyoMsintsi emveni kokufumana umnxeba obika isiganeko sokuqhekezwa kwevenkile yakwaCishe eMthokwane kunye neyakwaLotha eNgwane malunga nentsimbi yesibini ekuzeni kusa.
Ngokwengxelo zamangqina asekuhlaleni eNgwane, lamadoda aqale kwivenkile yakwaLotha eseNgwane nalapho afike abamba umnikazi wekhaya, uPhilile Mayiji ambophelela ngocingo ezandleni. UMayiji yena uthi ngamadoda amabini afike azokumvingcela kulendlu alala kuyo ingasemva kwevenkile.
“Bafike bakhaba ucango, bangena bandikhomba ngemipu emincinci emibini bandikhaba apha ezimbanjeni bandibeka phantsi…bandogquma ubuso nge-pillowcase kwanzima ukuphefumla, bandibopha imilenze ngoocingo…isandla bazibophe ngeqhina lam lecawe.” utsho njalo uMayiji.
UMayiji uthi bamthathele umnxeba oyiSamsung A07 exabisa i-R1 999 kunye neNokia encinci. Kusenjalo, elinye iqela lamadoda liqhaqhe amazinki kuphahla lwevenkile langena ngaphakathi lixhobe ngompu omde nehamile enkulu (4 pounds) esetyenziswe ekophuleni umnxeba afike ulapho.
Ekufikeni kwabo kulevenkile yakwaCishe abavulelwanga nanjengoko lomfo uthengiselayo ebebaxelela ukuba sele evalile. Kodwa bakhwele ngaphezulu baqhaqha izinki bangena bamkhomba ngombayimbayi phambi kokumgqhobha ekhosi ngemela, babuya bamdubula enzwaneni ngompu omfutshane kunyawo lasekhohlo.
Ixhoba lesithathu, Zalako Abiko (25), ongumthengiseli walevenkile iseMthokwane uthi bafike bephethe ibhegi ezimbini ezinkulu, baqhaqha nobhaka kwabathengiswayo bapakisha kuwo amacuba, iikawusi, iikepusi, izinto zothambisa nomtshini we-Flash. Bathathe umabonakude neminxeba yexhoba emibini exabisa R3 500 ne R1 800 kunye nemali engama-R4 000. Ngokophando lamapolisa, iimpahla ezithathiweyo kulevenkile zixabisa ama-R25 540 xa zizonke.
“Ndive ngezinja…bendifuna uvul’umnyango ndikrobe kodwa ndoyika” utsho umhlali ongumsebenzi kulomzi wasevenkileni.
“Lo mfana uthengiselayo uthi ukhwazile qha mna khange ndimve. Bendimamele i-radio kodwa ndiziva izinja ukuba zikhonkotha abantu abaninzi kuba bezivakala nezinye iinyawo zihamba apha emva kwendlu…ikhona into endixelele uba ndingaphumi kodwa ndidla ngophuma but ngalamini ndoyikile…” uqhubeke watsho lomhlali.
Lo mhlali ukwathi abanye abahlali abaphumileyo ngalamzuzu emveni kwesithonga babone abantu abaliqela beleqa ikhumbi ibisuka ngezantsi isenyusa indlela, nalapho bakhwele neebhegi ezimbini phambi kokuba iyivuthele leQuantam isingise ngentla.
Omabini amaxhoba, uAbiko noCokebo baleqiswe kwisibhedlela sakuGatyane kwangenqwelo ebihamba amapolisa. UCokebo unemivimbo yemvubu emzimbeni kwaye udumbile emhlafunweni kwicala langasekholo.
“Iyagula kakhulu mna le ayikho right ibethile sjambok le” utsho kanjalo uCokebo.
Oonokrawuzana bethu basephezu kwalo elinqaku nanjengoko liseshushu kwaye namapolisa asaqhuba nophando kwezilali zombini zaseNqabarha.
Ixhoba lesibini, uTozofo Cokebo (27) ongummi waseEthiopia ongumthengiseli kulevenkile yaseNgwane, uthi abarheme baqhaqhe uphahla ngaphambili evenkileni nakwikamera alala kuyo ukuze angene. Uthi ashiye ngemva ihamile, imvubu ne-sling bag esinomtshini wombane wokucheba inwele .
UCokebo uthi ubone amadoda asithandathu angene ngaphakathi evenkileni ngelixa ababini beme ngaphandle. Afike ambetha ebusweni phambi kokumtywatyusha ngemvubu esiqwini, amtshisa nasemlenzeni ngestovu sombane nanjengoko ebemnyanzelisa ukuba achaze imali apho ikhoyo. Uthi ukhuphe imali engangama-R3 000 phambi kokuba bathathe umnxeba wakhe oxabisa ama-R3 500 nomnye omncinci oxabisa ama-R270, kunye nomtshini we-Flash (R1 200).
Ngokophando lwabecuphi bakuGatyane nabaseMthatha abasabele ikhwelo ekuzeni kusa, impahla ethathwe kulevenkile iquka iintlobo zamacuba (R8 570), nezinto zokuthambisa (R3 600). UCokebo uthi baye bamqaba ngepeyinti emhlophe ebusweni bamnyusa iindlela bemkhombe ngomkhono wekati entloko, nanjengoko bebefuna ayonkqonkqoza kulevenkile iseMthokwane.
