Gatyana – Amnkelwe ngeziphekepheke ezivakalisa izikhalazo amagosa karhulumente ngabahlali abavakalisa ukungoneliseki zimeko zendlela, abo ngabahlali be Concerned Group yakwa ward 29 ngethuba besingise kwi Battle of Lurhwayizo.
Aba bahlali ngethuba uNokrawuzana wethu edlana indlebe kwakunye nabo bathi. Bazibhalile iincwadi ukuzisa kwabase magunyeni becela uncedo lokuba noko khe kubekho into eyenziwayo ngesimo sendlela batsho besithi ukuvukela kwabo apha kukuzama ukuba isicelo sabo sivakale. Bayibethelele into yokuba lo ngumngcelele woxolo – Peaceful match or demonstration hayi ukulwa norhulumente.
Bakungqinile ukuba amanye amagosa athile azithathile izikhalazo zabo – petitions ukubonakalisa ukuba bayakuva ubukho babo kulendawo.
Nono ndaba bamajelo amakhulu bebekhona ngethuba besingise eLurhwayizo bazibonela abahlali bevakalisa izikhalazo zabo.
Ngethuba iNkulumbuso yePhondo le Mpuma Kapa idlula kwisiphambuka sase Gwadu kwakunye nezinye izikhakhamela zase burhumenteni kuye kwanyanzeleka ukuba basabele isijwili sabahlali, abavuke ngenjixukuxa bezokuhambisa umyalezo wabo woxolo bekhalela indlela. UMnumzana Oscar Mbuyane uye wazibona sele etyikitya uxwebhu lezikhalazo zabahlali abakhalela iinkonzo ingakumbi indlela, lo ka Mbuyane uthembise ngokuba izikhalazo zabo zizakuphendulwa zingaphelanga iveki ezimbini.
Kwiveki ephelileyo abafundi besikolo samabanga aphakamileyo sase Nqabarha bazibone sele bengakwazi ukuya esikolweni ngethuba abaqhubi bezithuthi bebethe ngenqindi phantsi besithi baxolele ukumila ingca emqolo ezabo imoto azisayi kuwubeka umcondo wazo kwindlela engazose ihanjwe nazi doki. Abafundi base Nqabarha bazibone sele bengo nontente bafinyeza imibhinqo yabo bethuthwa ngezigadla ukuyo kudiba imisele enqumleze indlela ukuze bakwazi ukuya esikolweni.
Aba bahlali bathi bazibona bekhethelwa ecaleni okwephela emasini ngethuba kuvakala ukuba indlela ezakuhamba abo baseburhulumenteni iyakrwelwa ukuze batyibilike mthebelele ukuya kufika kwi Battle of Lurhwayizo.
Ngokweziphakamiso zika rhulumente sikhona isixa mali esibekelwe bucala ukuze kwenziwe isigaba sesithathu sendlela – Phase 3, kodwa bona abahlali bathi kumnyama ebusweni benkawu abazi nowathwethwa ukuba kumaxa kundawoni ngamalungiselelo ezoziphakamiso.
Ngethuba uSodolophu wesithili sase Amathole esenza intetha yakhe ye State of the District Address ubhengeze ukuba indlela engu phase 3 ikhona ikhona kwisicwangciso sabo.
