Zitshe zangqungqa iivenkile ezine (4) Buzi, Lewis, George’s Fruit and Veg kunye no Rajah Hardware kumgqibelo esiphuma kuwo.

Unobangela womlilo awaziwa kodwa abazibonele ngamehlo bathi umlilo uqale e Lewis.

Ngethuba sithetha nemanejala yenkile yakwa Rajah Hardware umnu Shanif Raan uthi uliqhwabela izandla isebe lezicima mlilo laku Centane ngoku rhuqa iinyawo ngethuba kusitsha iivenkile zabo,”Apha ayiyo nemizuzu emihlanu ukusuka kwi ofisi yabo uzokutsho apha kodwa khange bafike.” Lo ka Raan uqwele ngelithi kukho abantu abalahlekwe yimisebenzi yabo kodwa ubone kulungile ukuba ababhatale kude kuphele lena ka June inyanga.

Ngethuba sisiya kwi ofisi yezicima mlilo sifike kukhala ibhungane kungekho nomnye umsebenzi kwaye kungekho nenye imoto yokucima umlilo.

Umnu Shanif Raan uthi uzimisele ukuba aphinde avuse ishishini lakhe khonukuze abantu ebebesebenza phaya bakwazi ukugxotha ikati elele eziko.

Elinqaku silibhalelwe Ngu: Vuyo Flente

Mahasana – Ingxelo epheleleyo iqhuba ithi ngokwenene nangokwenyaniso ufunyenwe lowo ebesoloko kubhulwa kuseliwa kukhangelwana naye uSolomon Xethu. Ngokwengxelo esiyifumene kumthombo wolwazi (igama siligcinile) ozibonele ngamehlo usixelele ukuba lo ka Xethu ubanjwe ekuzeni kusa kwanamhlanje ehleli kumhlobo wakhe othile ekukrokreleka ukuba bayancazelana batshaya icuba kunye. Emva kokukhwazwa kuka iwu loka Xethu uphuncuke kwabobahlali waze wayokuzirhintyela wazixhoma waba kanti uyawunabela uqaqaqa. Lo nokrawuzana uthembekileyo ukungqinile ukuba amagosa esipolisa akwindawo yexhwayelo sithetha nje kusalindwe abakwa forensic. Ukhwathe belikhona iqaqobana lo sapho lika Solomon kule miheshuzo. Ngethuba ebuzwa uXethu ngentwazana ekutyholwa ukuba wayigebenga kusini na ukhombe indawo ethile nalapho phantsi komthi kuchazwa ukuba ukhombe mhlobo uthile owayekho ngelothuba lesehlo kodwa lo mhlobo usezokuthawuziswa ngemibuzo. Ibingekafunyanwa indawo awangcwatywa kuyo u Esethu Xethu nanjengoko isoyanyaniswa no Solomon.

Elinqaku liyaqhuba xa sifumana ezintsha sakukuphakela zinjalo

Mbhashe News – Indaba zenu zindaba zethu

Gatyana – Lukhala esimantshiyane lusithi lu gwetye lingenatyala ulutsha la ku Mgwebi nekuyilali ephantsi kwe dolophu yaku Gatyana, ku Masipala wase Mbhashe. Le lali yaku Mgwebi ngoko cando lwemida lomasipala kwagwetywa ukuba ibephantsi kuka wadi 23. Ngethuba besibhalela silelijelo bathe thaca incwadi ebonakalisa ukuba ibisisphekepheke ingxamile isingisele ku ceba wale wadi bephokoza imbilini yabo.

Umba obutshotshentla nekubonakala ukuba ubenza bangalali buhlayo ngumbamdela wokungabikho kwendlela esemgangathweni enxibelelanisa le lali kwakunye neelali ezingqongileyo eziquka iQhorha kwakunye ne Qwaninga. Lencwadi iqhuba ithi bafuna kulungiswe nale sele ikhona na kakade kuba ayikulungelanga ukusetyenziswa luluntu oluphilayo ngenxa yesimo esimaxongo nesinganyamezelekiyo ekuso lendlela. Baqhuba besithi amanzi asakhiwa ezintlanjeni ngokohlobo ekwakusenziwa ngalo kwilixa langaphambili.

Oluxwebhu luqhuba luthi iklinikhi ekhoyo kulelali ikude eluntwini bacela ukuba basondezelwe iklinikhi engu mahamba nendlwana (mobile clinic) nokuba kukanye ngeveki kuba abantu bayalimala ku mahlathi ase Qwaninga, abantu abadala abakwazi kufikelela kuyo neentsana ziyoyisakala ngumgama ohanjwayo ukuya kufuna uncedo lwezempilo. Bavakalise nokuba kwa isikolo sikude ebantwaneni kwa abo badala abakhuselekanga kuba kukho iintsunguzi ezimnyama endleleni esingise esikolweni. Balebele ngelithi bayathemba ukuba abasemagunyeni bakuthi bavakalelwe yile mbalelwano.

Kwelinye icala bavakalisa ukuba owayesakuba ngu wadi komiti wabo uvalela imfuyo yabo esikolweni nto leyo ifike ingabinandawo yokuhlala ezintliziyweni zabo kuba wenza ngetshova lakhe. Batsho besithi pahaha igama lakhe bekwasixelela oyena mntu bamfunayo lo babemphakamisile beluluntu.

UChristopher Ntuku othethela ulutsha uqukumbele ngelithi kwindawo yabo azingeni iimoto bancama babhenele ekubeni basebenzise iidonki ukuhlangabezana nemeko yendlela. Ukwayikhankanyile eyokuba bakhe bawuphakamisa lo mcimbi ku Masipala kodwa abakalufumani uncedo basajonge enkalweni ekubonakala ngathi nayo lo nkalo igutyungelwe yinkungu.

Gatyana – Ngokwengxelo epapashwe lijelo lika mabonakude uSABC, “kuthe gqolo ukubulawa kwabantu kwilali yase Chafutweni neyenye yelali ze dolophu yalapha ku Gatyana phantsi kwalo masipala wase Mbhashe”. Uluntu lale ndawo kuchazwa ukuba baphila ubom bentshontsho besoyikisela imiphefumlo yabo, yiyo lonto bekhala esimantshiyane becela uMphathiswa wezesipolisa uMnumzana Bheki Cele kwakunye noMkomishinala wamaplisa welizwe ukuba bangenelele. Ingxelo ngokwentatheli elandela elinqaku, lobhubhane waqala ngonyaka ka 2020 kodwa akukabikho mntu ubanjiweyo uzakuthi ga ngoku, utyibele ngelitshoyo unondaba.

UNkosi uNdabele Mtoto ukungqinile ngethuba ethetha nabendaba ukuba ngokwenene nangokwenyaniso kukho amakhaya ade avalwa ngenxa yokoyika esisimo sokubulawa kwabantu, watsho esithi naye kwikhaya lakhe unomninawa wakhe othe walixhoba lokudutyulwa kweziziganeko. U bawo uPhumzile Mkhekheletshe uthe kulendawo akukho umntu uzaziyo ukuba akanakuzibona ebhubhile, watsho esithi bayabacela abakurhulumento bazobancedisa ekufumaneni isizekabani nokubakhusela. Osisithethi samapolisa uMnumzana Thembinkosi Kinana uthe basabhula besela bewaphanda lamatyala kwaye banyuse izinga le patrol kwezindawo zichaphazelekayo. Elinqaku liphalazwe ngabakwa SABC babhala besithi “Kudutyulwe kwabulawa abantu abathandathu kwilali iChafutweni kuGatyane eMpuma Koloni. Eziziganeko zonke zenzeke kwisithuba seeveki ezintathu kule nyanga, ingekokokuqala kubulawa abantu kule lali.

Nali inqaku elipheleleyo labakwa SABC

SABC Indaba

MOTV

Elinqaku lilandelwe ngu Nomzwanele Mngoma wakwa SABC.

Mbhashe – Egameni lomasipala wase Mbhashe, ndininqwenelela iholide ze hlobo ezimyoli kunye nentsapho zenu. Kubantu abazakubasezindleleni banga bangaqhuba ngononophelo bathobele imithetho yezendlela bafike bephilile.

Mandithathe elithuba ndincome indima nenxaxheba yoluntu lonke, kuquka nolwe ngingqi yase Mbhashe, ngokusebenzisa ilungelo labo lokuvota ngethuba lolonyulo ebelibanjwe kwinyanga ye Nkanga 2021, nalapho uluntu luye lakhetha iinkokheli ezizakubasebenzela kule minyaka ukusukela ngonyaka ka 2021 ukuya ku 2026.

Unyaka ka 2021 ushiye abanye bephelelwe lithemba ngenxa yobhubhane we- Covid 19. Mandithathe ndidlulise amazwi ovelwano kubo bonke abathe baphulukana neentsapho zabo ngelithuba. Ndikwaqaphela bonke abo bazibophelele ekulweni ubhubhane we -Covid 19. Masiqhubeleke sizikhusela kwi -Covid 19 ngokuthatha ugonyo, sigcine imiqathango ebekiwe ukuze sithintele ulwasuleleko kunye nomsinga wesine. Yanga ningangena kunyaka omtsha ka 2022 nikhuselekile kwaye nisempilweni

NDININQWENELELA IXESHA LE HOLIDE ZEHLOBO EZIMYOLI KUNYE NONYAKA OMTSHA OGCWELE ZIINTSIKELELO