Gatyana – Zisanqunyanyisiwe izifundo okwethutyana kwisikolo samabanga aphakamileyo iNqabarha JSS ku Gatyana kude kubengomvulo weveki ezayo. Oku kuza emva kokuba kuqhambuke umlo phakathi kwabafundi besisikolo ngo Lwesibini. Ingxelo esiyibaliselwe ngozibonele ngamehlo nongumfundi kwesisikolo, ibika ukuba abafundi belali yase Mhlanga bencediswa ngabase Mpume bangquzulene kwakunye nabafundi belali yase Ntubeni bona bencediswa ngabase Ngwane. Isizathu salo dulubhentsu wababafundi kubikwa ukuba ngunobenani wokungavisisani ngomnqwazi, kutyholwa ukuba ibengoyena nobangela wokuqhambuka komlo wababafundi ebebejiwuzisa iintonga zokudlala igalufa, amabhunguza, iimvubu namaplanga. Ingxelo esiyibikelweyo ithi bakhona abafumene ukonzakala kulo miheshuzo.

Abazali abakufutshane nesikolo, kwanabo bajongene nokubamba ucwangco kulengingqi kuchazwa ukuba bazamile ukungenelela bezama ukulamla kwade kwafika amapolisa kamva. Nabo abafundisi ntsapho bazamile ukuhesha lomshologu kumasango esikolo.  Ngomvulo weveki ezayo abafundi, abazali kwakunye namapolisa bazakube bedibene esikolweni sase Nqabarha ukuzama ukufumana ichiza nesisombululo salembambano.

Gatyana – Ijike yabasisigqubu sezigebenga nemiguvela ilali yase Ngadla ku Gatyana. Uluntu lwale lali lisathokombisile emva kokudutyulwa kubulawe unovenkile nongummi wase Somalia kwiintsuku ezimbalwa ezidlulileyo. Ezingenayo kusasanje ingxelo ngokonokrawuzana osithele thsuphe sileli jelo ithi “Kudutyulwe lwangcola ungele umama othengisayo eMdikane kule lali, kukrokrelwa ukuba ibilikhuthuzo. Abaziboneleyo bona beve gezithonga zompu, exesheni bafike edada egazini sele eswelekile” Sileli jelo izolo besipapashe inqaku ngomzimba womntu obhaqwe uthiwe tya ngakwisiphambuka saku Magevane. Siyaxhalabisa isantya oluhamba ngaso ulwaphulo mthetho kwilali esihlala kuzo kulommndla.

Umbuzo uluntu olushiyeka luzibuza wona kukuba ingaba senzentoni ekuhlaleni okanye iyakuba ngubani ozakuthi achaphazeleke lulwaphulo mthetho kwilixa elilandelayo xa kunje? Ingaba abasemagunyeni benza ngokwaneleyo ekulweni nokusiphula neengcambu izenzo zobuguvela ezithegqolo ukwenzeka ekuhlaleni? Lowo ngumbuzo osadinga impendulo.